KËRCËNOHET GAZETARI OSMAN STAFA!

Gazetari Osman Stafa është kërcënuar gjatë ushtrimit të detyrës, pasi dokumentoi me pamje nxjerrjen e inerteve në lumin Shkumbin, në zonën e Hotolishtit, Librazhd.

Sipas kallëzimit të depozituar në Policinë e Elbasanit, pas përfundimit të filmimeve Stafa është ndjekur nga një automjet, i cili i ka prerë disa herë rrugën përgjatë aksit Librazhd-Elbasan. Më pas, drejtuesi i automjetit i ka bllokuar rrugën, duke krijuar një situatë kërcënuese gjatë ushtrimit të detyrës së gazetarit.

Rasti është denoncuar edhe nga Asociacioni i Gazetarëve të Shqipërisë (AGSH), i cili dënon çdo akt intimidimi apo presioni ndaj gazetarëve dhe kërkon zbardhjen e plotë të ngjarjes.

“Sot, gjatë dokumentimit të një rasti të nxjerrjes së inerteve në lumin Shkumbin, u përballa me një situatë që e konsideroj një përpjekje për intimidim dhe një kërcënim të hapur. Ndalimi që m’u bë në mes të rrugës i ngjan një akti mafioz. Pas filmimeve, një automjet më ndoqi dhe më preu rrugën. Për këtë ngjarje kam depozituar kallëzim në Policinë e Elbasanit”, shprehet gazetari Osman Stafa.

AGSH thekson se çdo përpjekje për të penguar raportimin mbi çështje me interes publik përbën cenim të lirisë së medias dhe të së drejtës së qytetarëve për t’u informuar.

Asociacioni i ka kërkuar Prokurorisë dhe Policisë së Shtetit ta trajtojnë rastin me prioritet, të zhvillojnë një hetim të plotë e të paanshëm dhe të marrin masat e nevojshme për garantimin e sigurisë së gazetarit.

Pamfleti