𝐋𝐚𝐫𝐠𝐢𝐦𝐢 𝐢 𝐌𝐚𝐫𝐣𝐚𝐧𝐚 𝐊𝐨 ç 𝐞𝐤𝐮𝐭 : 𝐃𝐢𝐧𝐣𝐢𝐭𝐞𝐭 𝐚𝐩𝐨 𝐭𝐡𝐣𝐞𝐬𝐡𝐭 𝐥𝐥𝐨𝐠𝐚𝐫𝐢 𝐩𝐨𝐥𝐢𝐭𝐢𝐤𝐞 ?

Lajmi i sotëm për largimin e deputetes së PS-së për Qarkun e Shkodrës, Marjana Koçeku, nga grupi parlamentar i mazhorancës, mbart në vete një peshë të dyfishtë. Në pamje të parë, ky hap mund të lexohet si një efekt fillestar dhe i prekshëm i protestës qytetare – një çarje e parë në murin e pushtetit që i shkëput Edi Ramës një karton në Parlament. Ndoshta, kjo lëvizje do të shërbejë si precedent për shkëputje të tjera të ngjashme apo për shfaqjen e zërave ndryshe brenda Partisë Socialiste.

Megjithatë, nëse gërvish pak sipërfaqen e këtij vendimi, skepticizmi është plotësisht i pashmangshëm për disa arsye të forta që nuk mund të harrohen:

Ku ishte Marjana atëherë kur pushteti i Ramës futi buldozerët dhe policinë e shtetit në Theth, duke shkatërruar me dhunë bujtinat e vetë banorëve të zonës së saj? Jo vetëm që nuk shfaqi asnjë shqetësim për atë dramë njerëzore e ekonomike, por u rreshtua hapur në mbështetje të veprimeve të kryeministrit. Po ashtu, që prej janarit të këtij viti, banorët e Rrjollit ndodhen në protestë të pandërprerë për të mbrojtur pronat e tyre, dhe deputetja në fjalë nuk gjeti asnjë rast të vetëm për t’i mbështetur apo për t’u bërë zëri i tyre.
Për më tepër, ajo ngriti kartonin në Parlament dhe firmosi ligjin famëkeq të “Paketës së Maleve”. Një akt ky që godet drejtpërdrejt zonat malore dhe që nga shumëkush shihet si një projekt që vulos tjetërsimin dhe grabitjen e pronave të banorëve në veri të vendit.

Mbi të gjitha, Marjana Koçeku nuk ka hyrë në Kuvendin e Shqipërisë si një emër i votuar direkt nga populli, por si produkt i listave të mbyllura të PS-së. Ajo është aty si një zgjedhje ekskluzive e partisë dhe e kryetarit të saj. Pikërisht për këtë arsye, vendimi i saj për t’u larguar vetëm nga grupi parlamentar është një akt tërësisht gjysmak.

Nëse ky veprim do të udhëhiqej nga ndershmëria dhe dinjiteti i vërtetë, hapi i vetëm logjik do të ishte dorëzimi i menjëhershëm i mandatit dhe lënia përgjithmonë e asaj karrigeje që ia dhuroi Rama. Duke zgjedhur të qëndrojë në Parlament si deputete e pavarur, ajo thjesht do të vazhdojë të paguhet dhe të sigurojë privilegjet e saj nga taksat e shqiptarëve.

Faktet flasin vetë: kjo nuk duket si një lëvizje për të ruajtur dinjitetin, por si një manovër e pastër politike për interesa krejtësisht personale. Siç thotë edhe një shprehje e mençur: një punë e bërë keq, është shumë më keq se një punë e panisur fare.

Shkruan Adrian Progni: