E shkuara e Refit Buzit: Rrëmbimi për 400 mijë paund në 2022 dhe paratë e drogës, shkaktarët e 3 viktimave!

Një konflikt i gjatë për shuma të konsiderueshme parash, të ardhura nga veprimtari kriminale në Britaninë e Madhe, dyshohet se çoi në ndarjen e Refit Buzit dhe Rozalinda Plakës, e cila kulmoi të premten me tre viktima.

Sipas të afërmve të Rozalindës, Refit Buzi, i njohur edhe si Nertil Buzi, e kishte kanosur më parë me armë, si dhe ishte arrestuar disa herë, por ishte liruar sërish.

Ngjarja mori përmasa tragjike një ditë më parë, kur Buzi vrau prindërit e ish-partneres, e mori atë peng dhe, pas tetë orësh negociatash të pasuksesshme me policinë, u vetëvra pa pranuar të dorëzohej.

Në një intervistë për shtypin, prindërit e Refit Buzit akuzuan ashpër familjen Plaka, duke pretenduar se i biri i tyre i kishte dërguar Rozalindës rreth 180 mijë paund gjatë periudhës që jetonte në Mbretërinë e Bashkuar, para të cilat familja e saj nuk pranoi t’i kthente.

Sipas tyre, edhe oferta për të zgjidhur mosmarrëveshjen duke marrë vetëm gjysmën e shumës u refuzua, çka solli tragjedinë me tre të vdekur.

Megjithatë, dëshmia e Rozalinda Plakës, e cila mbijetoi, pritet të ndriçojë rrethanat e kësaj ngjarjeje ku humbën jetën prindërit e saj dhe ish-partneri me të cilin ajo kishte një lidhje 9-vjeçare.

Refit Buzi kishte një të kaluar të lidhur me prodhimin e lëndëve narkotike në Britani. Në vitin 2022, ai u rrëmbye dhe u torturua për 12 ditë radhazi nga shtatë shqiptarë, të cilët i kërkonin familjes së tij 400 mijë paund për lirimin e tij.

Pasi nuk u arrit të sigurohej kjo shifër, vëllai i tij denoncoi rastin, duke vënë në veprim forcat e rendit në Shqipëri dhe Britani. Tetë hetues britanikë lokalizuan vendin e mbajtjes në një ndërtesë në Michingan dhe arrestuan shtatë shtetas shqiptarë, përfshirë një vajzë, të gjithë me precedentë penalë. Pas kësaj ngjarjeje, Buzi u kthye në Shqipëri, ku filluan mosmarrëveshjet me ish-të fejuarën dhe prindërit e saj rreth parave që pretendohet se nuk u kthyen.