REAGIM PUBLIK:

DPSHL i bën thirrje Gjykatës Kushtetuese të shqyrtojë menjëherë kërkesën për pezullimin e Aktit Normativ nr. 3

Diaspora për Shqipërinë e Lirë (DPSHL) njofton se ka depozituar pranë Gjykatës Kushtetuese kërkesën për shfuqizimin e Aktit Normativ nr. 3, datë 06.07.2026, si dhe kërkesën për pezullimin e menjëhershëm të zbatimit të tij, për shkak të pasojave të menjëhershme financiare që ky akt prodhon mbi fondet publike.

DPSHL i bën thirrje Gjykatës Kushtetuese që të shqyrtojë pa vonesë dhe me prioritet kërkesën për pezullim, duke mos lejuar që procedurat burokratike të bëhen pengesë për ushtrimin efektiv të kontrollit kushtetues.

Në respekt të institucionit të Gjykatës Kushtetuese dhe të shtetit të së drejtës, DPSHL ka vepruar me shpejtësi maksimale për të plotësuar çdo kërkesë procedurale dhe dokumentacion shtesë të kërkuar nga administrata e gjykatës. Është domethënëse se njoftimi dhe email-i për plotësim dokumentacioni kanë mbërritur në orën 14:38, vetëm 1 orë e 22 minuta përpara përfundimit të orarit zyrtar, megjithatë dokumentacioni është përgatitur dhe depozituar në kohë rekord (43 Minuta që nga marrja e lajmerimit nga Gjykata Kushtetuese), me qëllimin e vetëm që Gjykata të ketë mundësinë të shqyrtojë menjëherë kërkesën për pezullim.

Në këto kushte, DPSHL vlerëson se tashmë nuk ekziston asnjë arsye që çështja të zvarritet për shkaqe administrative apo procedurale, ndërkohë që akti objekt kundërshtimi vazhdon të prodhojë pasoja të menjëhershme financiare.

DPSHL thekson se kërkesa për pezullim nuk paragjykon vendimin përfundimtar mbi themelin e çështjes. Ajo synon vetëm ruajtjen e status quo-së dhe parandalimin e krijimit të një fakti të kryer përpara se Gjykata Kushtetuese të ketë mundësinë të ushtrojë kontrollin e saj kushtetues.

Besimi i qytetarëve te shteti i së drejtës ndërtohet kur ligji zbatohet me të njëjtin standard për të gjithë dhe kur kontrolli kushtetues është real, efektiv dhe në kohë. Pikërisht për këtë arsye, DPSHL i kërkon Gjykatës Kushtetuese që gjatë ditës së sotme të shqyrtojë kërkesën për pezullimin e Aktit Normativ nr. 3 dhe të garantojë që kontrolli kushtetues të mos mbetet një ushtrim formal pasi pasojat financiare të jenë konsumuar.

Diaspora për Shqipërinë e Lirë (DPSHL)
10 Korrik 2026