Burgim i përjetshëm për mjekun paliativ në Gjermani – shpallet fajtor për vrasjen e 15 pacientëve, ndërsa hetohen edhe dhjetëra viktima të tjera!

Një nga skandalet më të rënda dhe më tronditëse në historinë e sistemit shëndetësor gjerman ka marrë vendimin e parë përfundimtar në gjykatë. Gjykata Rajonale e Berlinit ka dënuar me burgim të përjetshëm mjekun paliativ 41-vjeçar, Johannes M., pasi e shpalli fajtor për vrasjen e 15 pacientëve të sëmurë rëndë, të cilët ishin nën kujdesin e tij mjekësor.

Vendimi është cilësuar si një nga më të rëndët e viteve të fundit në Gjermani, pasi gjykata konstatoi jo vetëm fajësinë e plotë të të pandehurit, por edhe rëndësinë e veçantë të fajit. Ky përcaktim juridik në sistemin gjerman do të thotë se ai nuk do të ketë të drejtën e zakonshme për të kërkuar lirim me kusht pas 15 vitesh, siç ndodh në shumë raste të dënimeve me burgim të përjetshëm.

Përveç dënimit me burg, gjykata urdhëroi që Johannes M. të mbetet nën mbikëqyrje të përhershme sigurie edhe pas vuajtjes së dënimit, ndërsa i ndaloi përgjithmonë ushtrimin e profesionit të mjekut.

Gjatë shpalljes së vendimit, kryetarja e trupit gjykues, Sylvia Busch, e cilësoi këtë çështje si “të paimagjinueshme” dhe theksoi se pacientët i kishin besuar jetën njeriut që kishte detyrimin moral dhe ligjor t’i mbronte.

“Ata kërkonin ndihmë, kujdes dhe dinjitet në ditët e fundit të jetës. Në vend të kësaj, u përballën me vdekjen e shkaktuar nga personi që duhej t’i shpëtonte dhe t’u lehtësonte vuajtjet,” u shpreh ajo.

Gjykata hodhi poshtë kategorikisht çdo pretendim se bëhej fjalë për eutanazi ose për veprime të motivuara nga mëshira ndaj pacientëve terminalë.

“Ai nuk vrau nga mëshira. Ai vrau sepse ishte në gjendje ta bënte këtë,” deklaroi gjykatësja, duke theksuar se motivi nuk kishte lidhje me kujdesin paliativ, por me vendimin e vetëdijshëm për t’u marrë jetën pacientëve.

Sipas hetimeve, mjeku përdorte injeksione me kombinime ilaçesh anestetike dhe relaksues muskulorë, të cilat shkaktonin paralizë të frymëmarrjes dhe vdekje brenda pak minutash. Viktimat nuk kishin dhënë asnjë pëlqim për një veprim të tillë dhe në asnjë rast nuk ekzistonte një procedurë ligjore për eutanazi.

Viktimat ishin 12 gra dhe 3 burra, të moshës nga 25 deri në 94 vjeç. Krimet u kryen mes shtatorit 2021 dhe korrikut 2024, kryesisht në banesat e pacientëve në Berlin, ku mjeku shkonte për vizita paliative, ndërsa një prej rasteve ndodhi në një hospice.

Hetimet zbuluan se në disa raste ai priste me qëllim derisa pacientët të mbeteshin vetëm në shtëpi për të kryer vrasjen. Në raste të tjera, ai veproi edhe kur familjarët ndodheshin në të njëjtën banesë, pa ngritur dyshime të menjëhershme.

Një nga episodet më rrëqethëse lidhet me një pacient 70-vjeçar. Sipas prokurorisë, mjeku i tha djalit të tij se do t’i administronte vetëm një ilaç kundër të vjellave. Në realitet, ai i injektoi substanca vdekjeprurëse, të cilat i morën jetën pacientit pak minuta më vonë.

Gjatë procesit gjyqësor u bë e ditur se në disa raste, pas vdekjes së pacientëve, mjeku dyshohet se ka tentuar të fshehë gjurmët e krimit, madje duke shkaktuar zjarr në banesat e viktimave për ta paraqitur ngjarjen si aksident ose për të shkatërruar provat.

Prokuroria argumentoi se veprimet e tij nuk ishin spontane, por të planifikuara me kujdes, të përsëritura dhe të kryera gjatë një periudhe disa vjeçare, duke treguar një model kriminal të vazhdueshëm.

Megjithatë, edhe pse gjykata e shpalli fajtor për 15 vrasje, autoritetet besojnë se ky mund të jetë vetëm fillimi i zbardhjes së kësaj çështjeje.

Në vendim thuhet se ekziston mundësia reale që numri i viktimave të jetë shumë më i madh.

“Me shumë gjasa, këto 15 raste përfaqësojnë vetëm majën e ajsbergut,” theksoi gjykata.

Aktualisht, Prokuroria e Berlinit po zhvillon hetime të reja për 76 raste të tjera vdekjesh të pacientëve paliativë që kanë qenë nën kujdesin e Johannes M. Për këtë arsye janë urdhëruar zhvarrime, ekspertiza mjeko-ligjore dhe analiza toksikologjike për të verifikuar nëse edhe këta pacientë kanë humbur jetën në të njëjtën mënyrë.

Nëse këto dyshime konfirmohen, ky rast mund të shndërrohet në një nga serialet kriminale më të mëdha të kryera ndonjëherë nga një mjek në historinë moderne të Gjermanisë, duke tronditur jo vetëm sistemin shëndetësor, por edhe besimin e qytetarëve ndaj profesionit të mjekut.

Ngjarja ka shkaktuar reagime të forta në opinionin publik gjerman, ndërsa ekspertët e etikës mjekësore kërkojnë forcimin e mekanizmave të kontrollit dhe mbikëqyrjes në shërbimet e kujdesit paliativ, në mënyrë që raste të tilla të mos përsëriten kurrë.