Rama ‘përzuri’ rininë, Shqipëria mbushet me azilkërkues nga Egjipti dhe Afganistani!

Shqipëria regjistroi një rritje të numrit të azilkërkuesve gjatë vitit 2025, ndërsa flukset migratore u përqendruan kryesisht në muajt e fundit të sezonit veror dhe fillimit të vjeshtës. Të dhënat më të fundit të publikuara nga Instituti i Statistikave (INSTAT) tregojnë se gjatë vitit të kaluar në vend u regjistruan 144 azilkërkues, duke shënuar një rritje prej 40 personash krahasuar me vitin 2024.

Sipas raportit, pjesa më e madhe e kërkesave për azil erdhi nga shtetas të Egjiptit, të cilët përbënin 39,6% të totalit të azilkërkuesve. Në vendin e dytë renditen shtetasit afganë me 11,8%, ndërsa shtetasit palestinezë përfaqësuan 9,7% të kërkesave të regjistruara gjatë vitit.

Analiza e shpërndarjes mujore të aplikimeve tregon një përqendrim të qartë sezonal. Muajt gusht, shtator dhe tetor përbënin së bashku 63,2% të të gjitha kërkesave për azil të regjistruara në Shqipëri gjatë vitit 2025, duke evidentuar një intensifikim të flukseve migratore në këtë periudhë.

Paralelisht me të dhënat për azilkërkuesit, raporti i INSTAT ofron edhe një panoramë të lëvizjeve të shtetësisë shqiptare. Gjatë vitit 2025, gjithsej 495 persona fituan shtetësinë shqiptare, ku 306 prej tyre e rifituan atë, ndërsa 189 persona e fituan për herë të parë. Në të njëjtën kohë, 173 persona hoqën dorë nga shtetësia shqiptare.

Sa i përket origjinës së personave që fituan shtetësinë shqiptare, pjesa dërrmuese vinte nga Kosova, me 56,1% të totalit. Më pas renditen shtetasit nga Turqia me 20,1%, ndërsa Maqedonia e Veriut dhe Italia përfaqësonin secila nga 4,8% të rasteve.

Të dhënat tregojnë gjithashtu se grupmosha 30-39 vjeç dominoi si tek personat që fituan shtetësinë shqiptare, ashtu edhe tek ata që vendosën ta lënë atë. Konkretisht, kjo grupmoshë përfaqësoi 31,7% të përfituesve të shtetësisë dhe 43,9% të personave që hoqën dorë prej saj.

Sipas metodologjisë së përdorur nga INSTAT, statistikat për azilkërkuesit dhe shtetësinë shqiptare bazohen në të dhënat e siguruara nga strukturat përkatëse të Ministrisë së Punëve të Brendshme. Për herë të parë, në vitin 2025 është integruar një burim i ri të dhënash për statistikat e shtetësisë, duke synuar rritjen e cilësisë, plotësisë dhe harmonizimit të informacionit me standardet ndërkombëtare.

Rritja e numrit të azilkërkuesve, së bashku me dinamikat e fitimit dhe lënies së shtetësisë, reflekton ndryshimet në lëvizjet migratore dhe zhvillimet demografike që po ndikojnë gjithnjë e më shumë edhe Shqipërinë, në një kontekst rajonal dhe ndërkombëtar në transformim të vazhdueshëm./https://www.standard.al/rama-perzuri-rinine-shqiperia-mbushet-me-azilkerkues-nga-egjipti-dhe-afganistani/