Belgjika dhe Holanda nënshkruajnë marrëveshje për blerjen e sistemeve të mbrojtjes ajrore NASAMS për mbrojtjen e hapësirës ajrore rajonale

Belgjika dhe Holanda kanë arritur një marrëveshje parimore për të blerë bashkërisht sistemet norvegjeze të mbrojtjes ajrore NASAMS. Marrëveshja përfshin dhjetë sisteme, ku nëntë janë caktuar për mbrojtjen e hapësirës ajrore belge dhe një për Luksemburgun, me një kosto të vlerësuar prej 2.5 miliardë eurosh.
“Jam shumë i kënaqur të njoftoj sot se do të nënshkruajmë një marrëveshje me Holandën për të blerë më shumë sisteme të mbrojtjes ajrore,” tha Ministri belg i Mbrojtjes, Theo Francken. “Ne kemi zgjedhur NASAMS, një sistem mbrojtjeje norvegjez, i cili do të mbrojë hapësirën tonë ajrore.”
Ministri Francken theksoi gjithashtu nevojën për kapacitete më të forta kundër dronëve dhe zbatim të shpejtë të sistemeve të reja. “Unë do t’i paraqes një dosje kabinetit qeveritar brenda dy javësh, duke propozuar blerjen e më shumë sistemeve dhe aktivizimin e tyre para Marsit të vitit të ardhshëm. Pra, gjërat do të ecin shpejt,” deklaroi ai.
NASAMS është një sistem modular i avancuar që përbëhet nga radarë, poste komandimi, lëshues (raketahedhës) dhe njësi komunikimi, duke ofruar deri në 94 për qind efikasitet kundër kërcënimeve në hyrje. Megjithatë, performanca e lartë ka koston e saj, ku çdo raketë kushton nga qindra mijëra deri në mbi një milion euro, në varësi të llojit.
Çdo lëshues mban gjashtë raketa, dhe me disa lëshues për bateri, kostoja totale e municionit rritet ndjeshëm. Ndonëse shifra prej 2.5 miliardë eurosh mbulon vetë sistemet, ajo nuk përfshin koston e raketave.
Gjatë një stërvitjeje të NATO-s në Norvegji, gazetari i VRT News, Bert De Vroey, vëzhgoi sistemin NASAMS në veprim, duke theksuar se “sistemi i armatimit bëri atë që pritej të bënte: të rrëzonte predhat në hyrje nga qielli.” Ai shtoi se “jo gjithçka shkoi sipas planit” dhe “ndonjëherë sistemet e armatimit shfaqën defekte”, megjithëse këto probleme mund të kenë qenë të lidhura me sisteme të tjera.
Marrëveshja pritet gjithashtu të mbështesë industrinë belge të mbrojtjes, veçanërisht prodhuesin valon të armëve FN Herstal. Kompania raportohet se ka arritur një marrëveshje me prodhuesin amerikan RTX për të lejuar prodhimin e raketave AMRAAM në Norvegji.
Ndonëse prodhimi lokal do të kërkojë kohë për të nisur, Belgjika ndërkohë do të jetë në gjendje të “marrë hua” raketa nga Polonia.