Zogu legjend i KF Tiranës:

PERSONAZH:

Indrit Fortuzi është një nga figurat më emblematike të futbollit shqiptar në vitet ’90 dhe fillim të viteve 2000, një emër që ngjall nostalgji dhe krenari për tifozët e Tiranës dhe jo vetëm. I njohur gjerësisht me nofkën “Zogu”, për shkak të shpejtësisë dhe mënyrës karakteristike të festimit të golave, Fortuzi është një ndër golashënuesit më të mirë në historinë e Kategorisë Superiore.

Karriera e tij e lavdishme është e lidhur ngushtë me KF Tirana, skuadrën me të cilën ka shkruar faqe të arta. Me bardheblutë, Fortuzi fitoi 7 tituj kampion, 5 Kupa të Shqipërisë dhe 6 Superkupa, duke qenë pjesë thelbësore e një brezi që dominoi futbollin shqiptar për më shumë se një dekadë.

Përpara se të shkëlqente me Tiranën, ai nisi karrierën te Dinamo, një tjetër klub i madh i kryeqytetit, por pikërisht nga Dinamo ai u transferua te Tirana, ku do të gjente veten dhe do të ndërtonte statusin e legjendës.

Në arenën ndërkombëtare, Fortuzi provoi fatin edhe jashtë kufijve, duke luajtur në kampionatin grek për skuadra si Apollon Kalamarias dhe Iraklis Thessaloniki, duke sjellë eksperiencën dhe stilin e tij të veçantë edhe në një ambient më konkurrues.

Ai ka qenë pjesë edhe e kombëtares shqiptare, me të cilën ka zhvilluar 27 ndeshje dhe ka shënuar 2 gola mes viteve 1992–2002. Ndërkohë që nuk munguan as sfidat në arenën ndërkombëtare me Tiranën, ku shpeshherë ai ka qenë protagonisti kryesor në përballje me emra të mëdhenj të Europës.

Pas tërheqjes nga futbolli aktiv, Indrit Fortuzi jeton prej vitesh larg atdheut, por gjithmonë ka ruajtur lidhjen shpirtërore me Tiranën dhe futbollin shqiptar.

Emri i Fortuzit mbetet sinonim i suksesit, përkushtimit dhe pasionit për fanellën bardheblu – një legjendë e gjallë e Tiranës, që do të kujtohet gjithmonë si një nga golashënuesit më të frikshëm që ka parë ndonjëherë kampionati shqiptar.