“Familja Cani shpërthen ndaj Ramës: ‘Mos e përdor më Martinin për propagandë – fëmija ynë u vra nga dështimi i shtetit!’”

Një dhimbje që nuk shuhet, një plagë që vazhdon të hapet sa herë politika përdor emrin e një fëmije të vrarë. Familja e Martin Canit ka dalë sot me një reagim të fortë publik, duke akuzuar drejtpërdrejt Kryeministrin Edi Rama se po e përdor tragjedinë e djalit të tyre për qëllime politike, ndërsa, sipas tyre, institucionet që kishin detyrimin ta mbronin vazhdojnë të mos japin asnjë përgjegjësi. Në një deklaratë të mbushur me dhimbje, revoltë dhe pyetje të rënda, familja ngre akuza për dështimin e sistemit arsimor, të strukturave të rendit dhe të sistemit shëndetësor, duke theksuar se asnjë masë propagandistike nuk mund të zëvendësojë drejtësinë dhe përgjegjësinë që, sipas tyre, mungojnë prej 18 muajsh. Për familjen Cani, Martini nuk ishte statistikë, nuk ishte slogan dhe nuk ishte instrument për debate politike, por një fëmijë me ëndrra, me të ardhme dhe me të drejtën për të jetuar. Ata kërkojnë që emri i tij të mos përdoret më si mburojë për të justifikuar dështimet e shtetit, por si një thirrje e fortë për ndryshim, drejtësi dhe mbrojtje reale të çdo fëmije në Shqipëri.

Më poshtë vijon deklarata e familjes.

Deklaratë për shtyp
Tiranë, 17.07.2026
Familja Cani shpreh indinjatën e saj të thellë për mënyrën se si Kryeministri Rama vazhdon të përdorë emrin e djalit tonë, Martin Cani, për qëllime politike dhe propagandistike, duke shmangur përgjegjësitë reale të institucioneve që dështuan ta mbronin.
Edhe sot, në fjalimin e tij publik, Kryeministri deklaroi se: “Prindërit duhet të ndihen të lehtësuar… qeveria është ndryshe nga si përshkruhet në kanalet sociale.” Por ndërkohë, realiteti është krejt tjetër: fëmijët vazhdojnë të vriten, institucionet vazhdojnë të dështojnë dhe tragjeditë nuk po ndalen.

1. Vrasjet e miturve nuk ndaluan pas mbylljes së TikTok
   Pavarësisht mbylljes së TikTok, të cilën qeveria e përdori si justifikim politik pas vrasjes së Martinit, realiteti është i qartë:

• Një i mitur u vra në Maliq.
• Një tjetër i mitur u vra në Durrës.
  Këto tragjedi tregojnë se rrjetet sociale nuk janë shkaku i vrasjeve, por dështimi i sistemit arsimor, mungesa e sigurisë në shkolla dhe papërgjegjshmëria institucionale.

1. Vendosja e kamerave nuk zgjidh problemin
   Kryeministri foli sot për “smart city në shkolla” dhe për vendosjen e kamerave, duke thënë se: “Algoritmi është një trup që bën atë që thotë.”
   Por kamerat:

• nuk parandalojnë dhunën,
• nuk zëvendësojnë psikologët,
• nuk zgjidhin mungesën e sigurisë,
• nuk e shpëtuan Martinin, dhe nuk do të shpëtojnë fëmijë të tjerë pa masa reale.
  Siguria në shkolla kërkon veprime, jo pajisje teknologjike për propagandë.

1. Kryeministri thotë se “mendon vazhdimisht për Martinin”, por nuk ka bërë asgjë për familjen tonë
   Nëse Kryeministri mendon vërtet për Martinin:

• Pse nuk ka takuar asnjëherë familjen tonë?
• Pse nuk ka ofruar asnjë mbështetje institucionale?
• Pse nuk ka kërkuar falje për dështimet e sistemit që ai drejton?
  Fjalët nuk mjaftojnë. Ne kemi parë vetëm heshtje, shmangie dhe përdorim politik të tragjedisë sonë.

1. Pse nuk është blerë pajisja e zemrës që do ta shpëtonte Martinin?
   Martini vdiq sepse:

• Spitali i Traumës nuk kishte kardiokirurg;
• Spitali i Traumës nuk kishte pajisjen zemër-mushkëri, që riparon zemrën e të plagosurve në zemër.
  Kjo pajisje kushton më pak se një makinë qeveritare, por ende nuk është blerë.
  Sa fëmijë të tjerë duhet të vdesin që qeveria të kuptojë se pajisjet shpëtojnë jetë, jo kamerat?

1. Pse Kryeministri nuk kritikoi ministrat që qeshën kur u përmend Martini në Parlament?
   Kur u përmend emri i Martinit në Kuvend:

• Ministrja Manastirliu qeshi;
• Ministrja Balluku qeshi.
  Kryeministri nuk tha asnjë fjalë. Asnjë distancim. Asnjë ndëshkim. Asnjë ndjesë.
  A është ky respekti që ai pretendon se ka për djalin tonë?

1. Policia nuk bëri detyrën – arma e krimit u gjet nga një kalimtar i rastësishëm
   Nëse policia do të kishte vepruar siç duhet:

• Arma e krimit nuk do të gjendej nga një qytetar i rastësishëm;
• Provat nuk do të rrezikonin të humbnin;
• Hetimi nuk do të ishte i cunguar.
  Kjo është dëshmi e qartë e dështimit të strukturave të rendit.

1. Kryeministri duhet të kërkojë mbylljen urgjente të hetimit 18-mujor për shkollën Fan Noli dhe sistemin shëndetësor
   Në vend që të politizojë tragjedinë e Martinit:

• Kryeministri duhet të kërkojë mbylljen urgjente të hetimit për përgjegjësinë e shkollës Fan Noli, e cila nuk njoftoi prindërit për incidentin e të premtes;
• Duhet të kërkojë mbylljen urgjente të hetimit për dështimin spektakolar të sistemit shëndetësor, që e dërgoi Martinin në spitalin e gabuar dhe nuk kishte pajisjet për ta shpëtuar.
  18 muaj hetim pa përgjigje është turp institucional.
  Ne nuk do të heshtim
  Martini nuk ishte slogan politik. Martini nuk ishte pretekst për censurë. Martini nuk ishte justifikim për kamera.
  Martini ishte një fëmijë i mirë, një futbollist me ëndrra, një djalë që meritonte të jetonte.
  Ne kërkojmë:
• Drejtësi për Martinin
• Siguri për fëmijët e Shqipërisë
• Përgjegjësi nga institucionet
• Veprime, jo fjalë
  Familja Cani Tiranë, 17.07.2026