Pse po ikin punëtorët e huaj nga Gjermania?

Një studim interesant…
Shumë punëtorë po vijnë në Gjermani nga vende të ndrshme, por shumë po largohen prapë. Po pse?
Gjermania ka nevojë urgjente për punëtorë të kualifikuar nga vendet e tjera, sepse në Gjermani aktualisht janë gati 700.000 vende të lira pune, ku në masë të madhe kërkohen kualifikime. Por një studim i ri tregon se shumë prej atyre që po vijnë në Gjermani, po e braktisin prapë vendin pas vetëm pak vitesh.

Sipas një analize të Institutit për Kërkime të Punësimit (IAB), emigrantët largohen nga Gjermania jo vetëm për arsye personale, por edhe për shkak të pengesave që lidhen me jetën dhe punën në vend. Ekspertët paralajmërojnë se nëse Gjermania dëshiron të menaxhojë me sukses migracionin, duhet të kuptojë edhe arsyet pse njerëzit po largohen.

Sipas të dhënave, ata që largohen nga Gjermania janë kryesisht më të rinj dhe shpesh kanë lidhje familjare jashtë vendit. Shumë prej tyre nuk kanë arritur të integrohen plotësisht në shoqërinë gjermane ose nuk kanë mësuar gjermanishten në nivel të mjaftueshëm.

Në disa studime thuhet se gati 40% e punëtorëve të huaj kanë menduar të largohen, ndonëse me siguri që nuk kthehen kaq shumë.

Po ku kthehen ata: Rreth 60% kthehen në vendin e tyre të origjinës.
Ndërsa 40% zhvendosen në vende të tjera, ku gjejnë kushte më të mira sesa në Gjermani.

Destinacionet më të preferuara të atyre që vendosin të largohen janë Spanja, Zvicra, Italia, Kroacia etj. thuhet në studim.

Ekspertët paralajmërojnë se Gjermania do ta humbë garën me vendet e tjera që po kërkojnë punëtorë të kualifikuar, në qoftë se nuk ndërmirren hapa kontretë që mundësojnë integrimin më të shpejtë dhe eliminimin e pengesave burokratike.

Shumë emigrantë ankohen për shembull, për procedurat e gjata dhe të ndërlikuara administrative. Ata përballen me:

📄 pritje të gjata për leje qëndrimi dhe natyralizim,
📄 vonesa në njohjen e diplomave dhe kualifikimeve,
📄 procedura të komplikuara për viza,
📄 tarifa të larta administrative,
📄 mungesë mbështetjeje në gjetjen e punës dhe zhvillimin e karrierës.

Këto pengesa krijojnë pasiguri dhe e bëjnë më të vështirë që emigrantët të planifikojnë të ardhmen e tyre në Gjermani.

Por një tjetër faktor që përmendet shpesh janë edhe përvojat me diskriminimin dhe mungesa e ndjenjës së mirëseardhjes, pastaj problemet me gjuhën dhe probleme të tjera.

“Pa njohuri të mira të gjuhës gjermane, perspektiva afatgjatë është e vështirë”, thonë ekspertët.

Aktualisht, shumë punëtorë të kualifikuar po vijnë nga Kenia, India dhe Vietnami, veçanërisht për sektorin e kujdesit shëndetësor dhe të moshuarve.

Gjermania po përpiqen të modernizojnë sistemet e veta për të eliminuar burokracinë. Janë duke u krijuar edhe struktura të reja administrative, por siç shihet akoma ka vështirësi.

Në studim thuhet se Gjermania nuk ka nevojë vetëm të tërheqë punëtorë të huaj, por edhe t’i mbajë ata. Për këtë duhen më pak burokraci, më shumë mbështetje, integrim më i mirë dhe perspektiva reale për një të ardhme afatgjatë në vend.