Gjermania dhe Ukraina kanë rënë dakort që do të prodhojnë armë bashkë:

Ministri gjerman i Mbrojtjes Boris Pistorius njoftoi gjatë një vizite në Ukrainë se po punohet në konstruktimin dhe prodhimin e përbashkët gjermano-ukrainas të dronëve me rreze veprimi deri në 1,500 kilometra.

Gjermania po përqendrohet në sipërmarrjet e përbashkëta midis kompanive gjermane dhe ukrainase në fushën e sistemeve pa pilot, tha Pistorius gjatë një vizite në Kiev.

Kjo vlen veçanërisht për zhvillimin dhe prodhimin e përbashkët të dronëve me rreze veprimi të ndryshme deri në 1,500 kilometra.

Sipas Presidentit ukrainas Volodymyr Zelenski, aktualisht ka gjashtë projekte të përbashkëta me Gjermaninë në prodhimin e armëve.

“Por ky është vetëm fillimi”, tha Zelenski në një takim me Pistorius. Ai falënderoi Gjermaninë për ndihmën e mëtejshme me mbrojtjen ajrore të Ukrainës kundër sulmeve ruse, por ai tha se nuk do të japë detaje duke shtuar: “Le të jetë një surprizë për rusët”.

Ndërsa Pistorius i tha Presidentit të Ukrainës: “Ju nuk jeni më vetëm një konsumator i sigurisë, por po ofroni siguri”.

Pistorius së bashku me homologun e tij ukrainas Mykhailo Fedorov, u zotuan gjithashtu për vazhdimin e trajnimit për ushtarët ukrainas. Deri më sot, Gjermania ka trajnuar “pothuajse 27,000 ushtarë” nga Ukraina dhe ajo do ta vazhdojë këtë, “edhe për periudhën pas një armëpushimi”.