Një “përplasje” diplomatike po zhvillohet në heshtje mes Tiranës dhe Dakës, ndërsa ish-oficeri i lartë i policisë së Bangladeshit, Sohel Rana, ndodhet në një burg në Shqipëri dhe kërkon azil politik për të shmangur ekstradimin drejt vendit të tij.

Një “përplasje” diplomatike po zhvillohet në heshtje mes Tiranës dhe Dakës, ndërsa ish-oficeri i lartë i policisë së Bangladeshit, Sohel Rana, ndodhet në një burg në Shqipëri dhe kërkon azil politik për të shmangur ekstradimin drejt vendit të tij.

Rana, i njohur si biznesmen dhe ish-inspektor policie në Daka, është një nga personat më të kërkuar në Bangladesh për një mashtrim financiar gjigant të lidhur me kompaninë online E-Orange, e cila u zhduk duke lënë pas dhjetëra mijëra qytetarë të dëmtuar dhe një humbje prej mbi 93 milionë euro.

Sipas mediave bangladeshe, përfshirë Prothom Alo, autoritetet e Dakës kanë dërguar kërkesa zyrtare për ekstradimin e tij në Shqipëri, por Tirana ende nuk ka dhënë përgjigje. Ndërkohë, Rana mbahet në paraburgim për arsye sigurie, në pritje të vendimit të drejtësisë shqiptare.

Ai pretendon se ndaj tij po zhvillohet një gjueti politike, duke përmendur lidhjet familjare me ish-kryeministren Sheikh Hasina, dhe paralajmëron se kthimi në Bangladesh do ta vendoste përballë rrezikut të dënimit me vdekje. Në kërkesën për azil, Rana deklaron se akuzat ndaj tij, përfshirë një çështje për vrasje, janë të fabrikuara. Avokati i tij në Tiranë thekson se, sipas Konventës Evropiane për të Drejtat e Njeriut, Shqipëria nuk mund të ekstradojë persona në vende ku ekziston mundësia e dënimit kapital.

Sipas të dhënave zyrtare, Rana është nën hetim për nëntë çështje penale në Daka, që përfshijnë mashtrim, përvetësim fondesh dhe pastrim parash, dhe është subjekt i një njoftimi të kuq të Interpolit që nga viti 2022. Pas shpërthimit të skandalit financiar, ai u arratis në Indi, ku u arrestua teksa përpiqej të kalonte në Nepal. Më vonë u gjurmua në Portugali dhe përfundimisht në Shqipëri, ku u arrestua më 1 shkurt 2025 në aeroportin “Nënë Tereza”.

Policia e Bangladeshit mohon akuzat për vrasje, duke i quajtur ato përpjekje për t’i shpëtuar drejtësisë, ndërsa kërkon nga Interpol rinovimin e urdhërarrestit ndërkombëtar për ta ekstraduar dhe gjykuar në Daka për mashtrimin që ka prekur mijëra qytetarë.